Jazarpena ekiditeko modurik eraginkorrena prebentzioa dela jakinik, ezinbestekoa da ikastolaren eskuetan jartzea bizikidetza positiboa eraikitzen laguntzen duten egiturak, antolatzeko neurriak, metodologia-hautuak, curriculum-garapenak, estrategiak eta tresnak.

Antolaketari dagokionez, aipatzekoak dira, besteak beste, ikasleen arteko harremanen kalitatea sustatzeko bitartekoak ezartzea, eta ikasleek duten ongizate emozionalaren maila ezagutzeko komunikazio-kanal seguruak izatea. Metogologiaren aldetik, lankidetzan oinarritutako eskaintza metodologikoen aldeko hautua egitea. Curriculumaren eremuan, egiteko nagusia izango da bizikidetza eraikitzearen alde eta esklusioari eta jazarpenari aurka egiteko jarduerak garatzea, eta estrategiei erreparatuz balizko jazarpen-egoerak detektatzeko eta ebaluatzeko tresnak ezagutzea eta esku-hartzea era egokian kudeatzea.

Egiturari dagokionez, ikastolan BAT taldea sortzen da (Bullyng-aren aurkako taldea).

Talde honek jazarpen-kasuak eta sortu daitezkeen beste protokolo guztiak ere koordinatuko ditu (Suizidio protokoloak, Ikasle transen protokoloak, Indarkeria matxista protokoloak, Babesgabetasun protokoloak…). Helburua protokoloen ebazpen prozesua jarraitzea izango da eta taldeak aurrera eramango ditu egin beharrekoak.

Bizikidetza positiboa lortzea ezinbestekoa izango da ikasleen ongizatea bermatzeko eta honela protokolo irekiera murrizteko.